فروری میںسردیوں کی راتیں ہوں یا خنک آلود شامیں جی چاہتا ہے کہ جسم کو طاقت اور اعصاب مضبوط بنانے والی غذائیں استعمال کی جائیں۔ شام کے ناشتے ہوں یا فرصت کے لمحے’سمجھدار لوگ تِل کے لڈو گجک اور اسی طرح میوئوں سے بنی مٹھائیاں کھاتے ہیں۔ آئیے گجک کا تعارف حاصل کیجیے۔یہ دو طرح کی ہوتی ہے ایک تو گُڑ سے بنائی جاتی ہے اور دوسری عام شکر کی مدد سے لیکن ذائقہ گُڑ والی ہی کا بہتر ہوتا ہے۔ اس میں شامل میوے اور تِل بیش بہا وٹامنز اور پروٹین مقوی دماغ ہوتےہیں۔ تل میں نباتاتی تیل کے علاوہ اہم مقویٔ دماغ جزولیسی تھین کی مقدار بھی ہوتی ہے۔ یہ دراصل فاسفورس آمیز چکنائی ہے جو دماغ اور اعصاب کی صحت کے لئے بہت ضروری ہے۔
تِل کے ایک بہترین غذائی دوا کے طور پر کھائیے۔ چھوٹے بچوں کورات کو بستر گیلا کرنے کی شکایت ہو یا بڑوں کوبار بار واش روم جانے کی حاجت ستائے، یہ تِل اور اس سے بنی اشیاء غذا کا جزو بنالینے سے گردوں اور مثانے کی خاصی پیچیدگیاں دور ہو جاتی ہیں۔
تِل کے لڈو بنانے والے حلوائی بتاتے ہیں کہ وہ منقیٰ اور ناریل کے علاوہ دُھلے ہوئے تِل کوٹ کر یہ لڈو بناتے ہیں۔ خاص کر سردیوں میں ضرور کھائیں تاکہ کیلوریز اور ناشاستہ مل سکے۔ بوڑھے لوگوں کو پروٹیسٹ کے غدود بڑھنے کی شکایت میں مفید ہوتے ہیں۔ اگر آپ تلوں کو گھی میں بھون کر گُڑ یا شکر کے ساتھ خوب چبا کر کھائیں اور آدھی پیالی دودھ پی لیں تو ان کی افادیت کے خود قائل ہو جائیں گے۔ یہ جسم سے بلغم، نزلہ اور پیشاب کی زیادتی کوروکنے کے لیے بہترین ٹانک ہے۔
یوں تو چاروں موسم ہمارےمزاج کے مطابق بنائے گئے ہیںلیکن موسموں کی تبدیلی مثبت اور منفی اثرات کرتی ہے۔ گرمیوں میں پانی کااستعمال بڑھ جاتا ہے کیونکہ پسینے کی صورت میں جسم کا پانی خارج ہوتا ہے۔پانی جسم کا درجہ حرارت نارمل رکھتا ہے۔ موسم سرما میں جسم باہر سے ٹھنڈا اور اندر سے گرم ہوتا ہے۔ پانی کے کم استعمال کی وجہ سے گردوں اور مثانے پر غیر ضروری دبائو پڑتا ہے۔ سردیوں میںپانی کا استعمال کم نہیں کیا جانا چاہئے لیکن عام طور پر لوگ کہتے ہیںکہ پیاس نہیںلگتی یہ قطعی غلط ہے اور پانی نہ پیناخود پر ظلم کرنے کے مترادف ہے۔ پانی بھی پئیں اور موسم کی سوغاتیں بھی کھائیں کہ ان میں ہیںمعدنیات اور وٹامنز کا ایسا خزانہ جو ہمیں موسموں کی سختی سے نبردآزما ہونے کے لیے تیار کرتی ہیں۔